7‏/12‏/2012

الخطط السياسية


اجتماع يشمل: وزير المقاطعات، ابو السحالي، ابو زياد، وشلة من الشباب المتحمس
المكان: على البرندة
الزمان: خلال الاسابيع الاخيرة


وزير المقاطعات: يا جماعة اهلا وسهلا فيكو، الليلة بدنا نحكي بموضوع مهم.
 جماعة ابو الجورج الان يلقبونني بوزير المقاطعات. انتو شايفين بالمقاطعة اشي غلط؟

ابو زياد: ولو، هاي اصلا التكتيك تبعي من زمان. المقاطعة هي عكس توحيد البلد، وما دامت البلد مقسومة ومش متوحدة، الامل النا بالجلوس فوق كرسي الجلد الاسود بكون اكبر.

ابو السحالي: طبعا، وشكرا لك على دروس السياسة القديمة التي لقنتنا اياها في سنوات السبعين. لولاها لما جلسنا على الكرسي لمدة 15 سنة، ولما وصلنا الى ما وصلناه من جاه وتاج وصولجان، لنا الذهب والياقوت والمرجان.

الشباب المتحمس: ولا يهمك، احنا بظهرك. بدك نضرب بنضرب، بدك نسكت بنسكت.

وزير المقاطعات: يعني فكركو لازم اظل انسان مقاطع كل اشي؟

ابو زياد: بس قاطع! وخليهن يحكو اللي بدهن يحكوه. اصلا لما هني يحكو عليك، هني عمليا عم بحكو عنك، ومش مهم ايش ما يحكو عنك، هاي دعاي انتخابية لالك!

وزير المقاطعات: كيف وليش ، مش فاهم هاي الجملة؟

ابو زياد: لأنو اذا ما جابوش سيرتك بالشارع، بتنساك البلد، وبفكروك بطلت ترشح حالك. خلي سيرتك على لسان اهل البلد. احسن.

ابو السحالي: نعم، انا مع كل ما قاله الاب الروحي، الى الابد الى الابد يا حافظ البلد!

الشباب المتحمس: ولا يهمك، احنا بظهرك. بدك نضرب بنضرب، بدك نسكت بنسكت.

وزير المقاطعات: يعني اظل مدوبز ومتنح وقاعد بالبيت احسنلي من انو احكي مع الناس ويشوفوني بالشارع؟

ابو السحالي: لا تخاف، فانا سوف ادعمك بكل وضوح، وخصوصا في احدى الحارات التي اعتقد انه لا زال لدي فيها الكثير من التأثير على الناخبين. فبيع الكلام سهل، وتوزيع المفخرة على الناس اسهل. انا اعرف دواء الكثيرين. نريدك فقط ان لا تظهر امام الناس (احسن ما تغلطلك بزلة لسان)، وقاطع حتى النهاية!

الشباب المتحمس: ولا يهمك، احنا بظهرك. بدك نضرب بنضرب، بدك نسكت بنسكت.

وزير المقاطعات (لم يقتنع بهذه الفلسفة بعد): واذا حدثت مشكلة، وانا يعني وراي عيلة كبيرة، ولازم اتصرف كزعيم لهاي العيلة. شو يعني ما أحكيش مع حدا منهن عشان ما ابينش بالشارع؟

ابو زياد: لما بدك تحكي مع حدا، استعمل التلفون.

وزير المقاطعات: شو تلفون؟ يعني زعيم كبير على التلفون؟!!

ابو السحالي: ارجوك ثم ارجوك، (يغضب ويتحول الى العامية) انتي مشيلنا اياها شوي لبعد انتخابات الكنيست، بلاش مشاكل بالشارع، عشان هيك بلاش ما تبين. خلص، افهم علي، بدنا نجيب هلالف صوت. حكلي تحكلك يعني.

وزير المقاطعات: شو يعني، بدكوش اياني اكون زعيم؟ شو مستحيين فيي؟  يعني اسا صرت بدي اصدق اللي بحكيه موقع "ليش هيك" انكو بدكوش ترشحوني ، ومن ورا ظهري! تخلونيش اطفر، انتو بتعرفوني لما تطربش الامور معاي.

ابو زياد: على مهلك يا ابني، اسا منخسر اصوات.

وزير المقاطعات: اللي بدو يصوتلي اهلا وسهلا، واللي بدوش لصرمايتي!!  
(على فكرة، هاي الجملة قالها وزير المواصلات قبل اسبوع بالحرف الواحد في احدى الدكاكين، ورفع صرمايتو وضرب عليها كمان!!).


 وفي النهاية، ابو السحالي يقترب من ابو زياد ويهمس: شو هالعلقة هاي. بلكي بعد 22-1-2013  منلاقيلنا طريقة نزيحو على جنب. خلينا نجيب هلالف صوت اسا اهم اشي.


ولا زال الشباب المتحمس يردد حتى اليوم: ولا يهمك، احنا بظهرك. بدك نضرب بنضرب، بدك نسكت بنسكت...